muy

Muy, m. monosyllab. Est une espece de mesure d'aucunes choses liquides de boisson, comme vin, eauë; et d'aucunes non liquides, comme grains, sel, chaulx, legumes. Lequel ne se partit par mesmes noms desoubs mesures en toutes lesdites choses, qui sont mesurées en gros par son nom: Car en cas de vin et choses semblables, il se partit en deux demy muyds, chascun d'iceux, au fust et jaulge de Paris, contenant dixhuit sextiers, chascun sextier quatre quartes, chasque quarte deux pintes, chasque pinte deux chopines, chasque chopine deux demy-sextiers, chasque demy-sextier deux possons, lequel posson est la derniere et moindre mesure du vin, Dolium. Mais aux choses arides, mesmes en cas de grains, Il se partit en douze sextiers, chasque sextier contenant deux mines, chasque mine deux minots, chasque minot trois boisseaux, chasque boisseau quatre quarts, lequel quart est la derniere mesure des grains, pour rectifier lesquelles mesures à la rigueur du poids, est dit et tenu pour regle, que le sextier de bled froment net, rabbatu le poids du sac, doibt peser deux cens vingt livres, et les mesures d'au dessus et d'au dessoubs à l'equipollent. Or la mesure et poids des febves, pois, navette, vesse, et autres legumes, est semblable à celle dessusdite du bled, sans qu'il y ayt rien de different, si n'est qu'on les vend et debite par soubs- partition dudit quart en demy-quart, litterons et demy-litterons, chascun demy quart contenant deux litterons, chascun litteron deux demys litterons, qui est chascun le huictiesme du quart, et le seisiesme du boisseau, ce qui est observé pour l'usage et commodité du peuple bas. Mais quant à l'avoine, il y a de la difference, pour autant qu'à la mesure d'icelle le minot contient quatre boisseaux. Et que entre le boisseau et le quart il y entre la mesure du picotin, lequel doibt contenir un quart et un litteron à ladite mesure du bled, combien qu'on le face de moindre capacité que le quart. Aussi le boisseau de l'avoine est plus grand que celuy du bled: Car pour faire les seize boisseaux du sextier de l'avoine, il y en fault vingt un à la mesure du bled, Modius. Duquel mot Latin le François est forgé. On usurpe aussi en aucuns païs, comme à Orleans et lieux adjacents, ce mot Muy, Pro certo agri modo, tout ainsi qu'on fait ailleurs le mot d'arpent, et dit on, Il a tant de muyds de terre, et, Ma terre est de tant de muyds, comme si vous disiez, de tant d'arpens, Tot terrae aut glebae modios possidet.

Un muy de grain de froument, selon la mesure de Paris, contenant vingtquatre mines, Modius tritici.

Un muy de vin, lequel à Paris contient trente six sextiers, et le sextier tient huit pintes, Modius vini.

Demy muy, Dimidius modius.

Qui tient dix muys, Decemmodiae.

Thresor de la langue françoyse. Jean Nicot.